شن طن.. حين ينقلب التعليم الحر تعليما مر | #chantan telePLUS

شن طن.. حين ينقلب التعليم الحر تعليما مر | #chantan telePLUS

سلام عليكم
كيقول المثل المغربي
نهار حتاجيتك آوجهي قمشوك المشاش
هاذ المثل ممكن إعتباروا الوصف الأدق
للوضع لي وصلو ليه أرباب المؤسسات التعليمية
مع أولياء الأمور بخصوص الرسوم الشهرية
ففي الوقت لي حنا فأمس الحاجة للتلاحم والتآخي وشي يهز الحمل على شي

لا
شي ناس الله يهديهم دايرين العصا في الرويضة
أو رافضين النقاش كيف ما كان ومع من ما كان
أو متمسكين بالحصول على الواجبات الشهرية المدرسية
الخاصة بالفترة ديال الحجر الصحي كاملة مكمولة
إيوا ونتوما شنو بان ليكم…؟
نخليكم تفكرو في هذا الموضوع
أرا الجينيريك

كيف ما شفنا مؤخرا الحدة ديال الخلاف
مبين أولياء الأمور وأرباب المؤسسات التعليمية الخاصة غاديا وكتزاد
خلاف السبب ديالو المباشر هو إصرار أرباب المؤسسات التعليمية
على الحصول على الواجبات الشهرية بدون نقصان
وهاذ شي كامل بالرغم من توقف الدراسة الحضورية
خلال الشهور الأخيرة بسبب الحجر الصحي

حتى لهنا مكاين تا إشكال الأمر عادي وممكن أنه يتناقش
ولكن بالجهة المقابلة أولياء الأمور كيرفضو أداء هاذ الواجبات
وهاذ شي كامل لسبب بسيط
أنو الدروس عن بعد لا ترقى لمستوى الدروس الحضورية
هذا بالإضافة للأزمات المالية الخانقة لكتمر منها معظم الأسر
بسبب قلة المداخيل وكثرة المصاريف
هاذ جوج عوامل لي أرهقت كاهل الأسر

ما علينا خلاف بحال هذا كيتطلب جلوس الأطراف المعنية مع بعضها البعض
والنقاش من أجل الوصول لحلول لتكون مرضية للجميع
بغض النظر على شكون لي متضرر أكثر
وشكون لي على حق وشكون لي كيدعي الضرر
حل على قدر ما هوا بسيط وساهل
إلا أنو كيصعاب وكيدخل فدائرة المستحيل
في ظل بعض الممارسات ديال شي ناس الله يهديهم
خصوصا ملي كتحول لغة الحوار والنقاش
إلى لغة وعيد أو تهديد

تصريح بحال هذا من مسير أو مدير مؤسسة
أو مؤطر كيصعاب الفهم ديالو كيفما كيصعاب توقع التبعات ديالو
فهو عوض ما يطفي نار الغضب ويدخل بخيط بيض
باش يتحل هاذ الإشكال مرة وحدة
فهو كيزيد يشعلها وكيهز شعار حنا ومن بعد منا الطوفان
صدقوني الأمور ما كتحلش بهاذ الطريقة
وعمر التهديد ما كان حل
هذا بلا ما نتكلمو على القانونية ديال الإجراءات لي كيتكلم عليها
ولي لربما تظل من وحي الخيال
وإيلا كان المقصود بالقوانين
وحنا غنعرفو شنو نديرو شي ميثاق شرف
لي غيجمع المؤسسات التعليمية كاملة
المنضوية تحت لواء شي منظمة معينة
فكونو على يقين هاذ شي راه معندو باش تنفع
لأنها غادا غير طول الخلاف
وغيخلصو الثمن ديال هاذ الخلاف
التلاميذ وأولياء الأمور وأرباب المؤسسات وحتى الأطر التعليمية

وعلى ذكر الأطر التعليمية
ولي شكلو شماعة لبعض مدراء المدارس
لي علقو عليها التشبت ديالهم بإستخلاص الواجبات الشهرية كاملة
بحكم أنهم أداو الأجور ديال هاذ الأطر
فيكفي أننا نشوفو هاذ المشاهد
مشاهد كتدفعنا باش نعاودو نطرحو السؤال فين كاين الإشكال؟
واش في أولياء الأمور لي عندهم مشكل مع أرباب المدارس؟
أولا في أرباب المدارس لي عندهم مشكل مع أولياء الأمور؟
ومع الأطر التعليمية في نفس الوقت؟

وقبل ما نختم
الحديث على الطرفين الرئيسيين في هاذ الخلاف
ما يمكنش ينسينا بلي كاين طرف ثالث
هوا المسؤول الرئيسي على حل هاذ النزاع
إذا تعذر التوصل إلى حل ثنائي أو ودي
الطرف لي يعتبر الوصي على القطاع كامل

وكنعني هنا الحكومة والوزارة
لي يفترض أنهم يدخلو على الخط بشكل إيجابي لضمان حقوق الجميع
حيث إلا بقينا على هاذ الحال المشكل غيبقى غادي وكيكبر
ومن خلاف غنوليو فأزمة
ومن خلافات ثنائية غنوليو فخلافات مؤسساتية
حيث كيف كيقول المثل المغربي قطرة قطرة كيحمل الواد
وحنا عاد باغين نخرجو من أزمة كبيرة
ومحتاجين أننا نديرو ليد في اليد باش نزيدو القدام
ماشي تبقاوش تجرونا للقاع
تهلاو